دليل القلادة في أول ولادة

السلام عليكم و رحمة الله و بركاته

بسم الله و الصلاة و السلام على خير معلم الناس الخير

---

أولاً

مقدمة

ربنا أنعم و مَنَّ علينا من سبع شهور و رزقنا أول طفل, كانت تجربة عجيبة, فيها خلطة عجيبة من الفرحة و العياط و الزعل و الفرحة و الخناق و الوفاق و قلة النوم و راحة البال - ف حبيت أشارك الناس تجربتي لإننا اتعلمنا منها كتير ف حبيت افيدكم و أنصحكم نصيحة المُجرِّب

الموضوع مقسم لثلاثة أقسام رئيسية
أولاً: مقدمة و هدف و شوية تحابيش
ثانيا: ماقبل الولادة
ثالثاً: مابعد الولادة

الهدف

الهدف من البوست هو إني أوعيكم و أفتح عينكم على حاجات ممكن ماتكنش جات على بالكم و بالذات للي أول مرة يدخلوا في الولادة

قد يكون فيه إختلاف من تجربتي الشخصية لتجربتكم الشخصية, في الآخر إحنا بشر و فيه عوامل كتير جدا بتأثر في تجربة الشخص الواحد عن غيره

لو فيه أي حاجة تحبوا تتناقشوا فيها مافيش مشكلة, ماعتقدش إني هاذكر اسماء إلا لو إتطلب مني شخصياً, الهدف هو إني أوعّي الناس لإيه الأفضل من إيه مش إني أشهّر بحد

لمين الكلام ده؟

 الكلام ده موجه بصفة رئيسية للناس اللي في مرحلة الولادة بالذات الأب أو الأم, بس حلو برضه للناس اللي لسه متجوزين (رجاله و ستات) و إخواتهم أو الناس اللي هاتبقى ملازمة للأم بصفة شبه دائمة (الأخت/صاحبتها/والدتها)
الدكاترة لو حابّين يبصوا على وجهات نظر غير اللي اتعودوا عليها
و للناس اللي ناوية تتجوز عشان يبقى عندها تصور منطقي لما بعد الجواز عشان مايجيلهمش إحباط لإن سقف توقعاتهم  قد ينهار و كده :D

 إزاي تستفيد بالكلام ده أقصى إستفادة؟

ماتقعدش تحفظ في الكلام, لإن المعلومات قد تكون كتيرة على إنك تكتبها في ورقة و عشان تبص فيها ساعة الولادة لإنك غالباً هاتبقى ملخوم

و لكن

من اللحظة دي لحد الولادة إقرا الكلام ده بالراحة مرة كل إسبوع بحيث الكلام يبقى في عقلك الباطن بحيث ساعة الجد مخك يساعدك بيه ماتضطرش تقعد تبص في ورق و موبايلات و بتاع :) حاول بالميت تقراه من 3 ل 5 مرات قبل الولادة

 المصادر

طيب ليه تقدروا تعتبروا الكلام مصدر ثقة؟

1- من الحاجات اللي ربنا أنعم علينا بيها إننا بنحب ندور عالنت -و كمان بحكم طبيعة شغلي- و نقرا كتير عن أي حاجة إحنا هانعملها أو هانشتريها (و الموضوع قد يكون مُنغِّص في بعض الأوقات لإنه بيستهلك طاقتك النفسية و المُخَِية)

2- الكلام/المعلومات اللي هاكتبها هاتبقى بناءاً على آخر معلومات طبية قرأناها من مؤسسات الصحة البريطانية/الأمريكية/الأسترالية أو اتعلمنا عنها من الدكاترة في مصر و بره مصر
*لو فيه دكتور عنده معلومة طبية من مصدر موثوق ينقد بيها أي معلومة من المذكورة أدناه يا ريت يبلغني بيها

3- ربنا أكرمنا و لفينا كتيرندور و نسأل على دكاترة -نساء- ولادة يكونوا بيتقوا الله في أمر الولادة الطبيعية و على أول فترة الولادة و إيه الأساليب المُتبّعة في مصر (بحكم إني أصغر واحد في العيلة و العمارة فكان فيه ناس قابلي خاضوا تجارب و إستفسرت منهم على قد ما أقدر عن تجاربهم الشخصية, ده غير معاشرتي ليهم)
و بره مصر بحكم طبيعة شغلي إننا ماكناش قاعدين في مصر بس نزلنا على الولادة

نصائح عامة

- هاتسمعوا كمية هري من الناس مافيش بعد كده (ولا أستثني نفسي, ممكن أكون هرّاي بعد ده كله :) )
- الناس بتتكلم من وجهة نظرها مش من وجهة نظر العلم أو الإحصاء مع عدم أخذ الموقف الكلي في الإعتبار
*مثلاً, كان فيه اتنين اعرفهم حامل في فترة متقاربة جدا, و كان أصحاب الأولى يقولوها إيه ده انت بنتك صغيرة أوي كده ليه ده كده خطر, و يقولوا للتانية إيه ده انت ابنك كبير أوي كده ليه ده كده خطر, و الحمد لله البنت و الولد اتولدوا عادي من غير أي مشاكل لا في صحتهم ولا صحة أمهم :)

-الناس إلا من رحم ربي, قد يتأثروا بعدة عوامل و هما بينصحوكم كحالتهم النفسية (مش مجانين) بس حبهم أو عدم حبهم ليكم قد يكون له تأثير ممكن يتأثروا بالوضع المادي
- الناس فيه منهم اللي بيعمل حاجات غيرهم مايقدرش عليها, فيه ناس تقدر تمشي كل يوم أثناء الحمل, غيرهم لأ, فيه ناس يقدروا يروحوا الدكتور الفلاني أو المستشفى العلاني غيرهم مايقدرش, فيه منهم اللي عنده وقت يقرا غيرهم مايقدرش ... إلخ

- ضروري جدا تفهم إن في كل حتة فيه ناس و دكاترة بتتقي الله, ماتخليش حد يسودها في وشك كلام من ناحية 
*يا عم هو بقى فيه دكاترة عدلين في البلد دي
*هاتولدي قيسري زي بقية مخاليق ربنا ولا انت فاكرة نفسك ايه
*وانت يعني هاتخافي على ابنك أكتر من بقية الناس
*ديه بس عشان أول ولادة و بعد كده مش هاتهتمي عادي

-ربنا ثم ربنا ثم ربنا, الله رؤوف بعباده, ربنا ماخلقناش عشان يعذبنا, و هو رحيم بينا في كل الحالات أكثر من أمهاتنا, الموضوع محتاج تدريب إنكم تثقوا في ربنا ثقة عمياء
فيه خطوتين مهمين جدا:

*أولاً تعملوا اللي عليكم من ناحية التدوير و صلاة الإستخارة و الصدقة (حتى ولو جنيه واحد لو ده اللي تقدروا عليه -رب درهم سبقة مئة ألف درهم-)
*ثانيا تسيوا الأمر برُمّته على ربنا وانتوا واثقين إن ده هو اللي يناسبكم و لو إنكم اتفتحلكم باب المستقبل كنتوا هاتختاروا ده برضه
اعرف ناس القيسري بالنسبة ليهم كان رحمة لإنهم نفسيتهم ضعيفة مايقدروش يستحملوا جرح سكينة مش طلق الولادة

---

ثانيا - قبل الولادة

معلوماتنا في الجزء ده شاحّة شوية لإن الحمد لله ماكانش فيه مشاكل كبيرة في الجزء ده

بس حبة نصايح هنا حابب أوجهها و بالذات للرجّاله لإنهم هايكونوا السند ساعتها (إعتبر نفسك كوتش الفرقة):

- الحمل 3 فترات:

1- أول 3 شهور في الحمل بيختلف تأثيرهم بين الستات و بعضهم (مافيش قاعدة ثابتة) من ناحية الوَحَم و الدوخة/التعب
* حتى الستات مابيبقوش عارفين هما أنهي نوع ف معلش استحمل مراتك فيهم, هي حامل في ابنك/بنتك في الآخر

2- ال3 شهور اللي في النص بيبقوا قشطة, بيبتدي البيبي يتحرك و يبتدي يبقى ليه ملامح في السونار و حاجة آخر شهيصة و إنبساط, إنبسطوا رجاءاً و حاولوا تشحنوا إنبساط لفترة ما بعد الولادة

3- آخر 3 شهور البيبي وزنه بيتقل, و هاتلاقي الحركة بقت أصعب لمراتك,ولكن هاتحتاج تتحرك عشان تساعد عضلة الحوض إنها تقوى
رجاءا ساعدها و أهو كله بثوابه يا حج

- خدوا فيتامينات و أكّلها كل حاجة مفيدة (تفادى الحلويات و النشويات قللوهم جامد), ده مفيد للبيبي و مفيد للأم لإنها بعد الولادة بتفقد مواد غذئية كتير, و مفيد ليك عشان تقوى كده, عشان اللي جاي هايبقى مُرهِق حبتين بس ربنا يعينك, هو صعب بس اتوكل على الله و كله هايعدي ماتقلقش

- الدكاترة الستات مش وحشين زي ما الإشاعات بتقول, بالعكس حلوين جدا و بيبقوا حاسّين بالست 

- دوروا على دكتورة تكون بتتقي الله و تكونوا تعرفوا حد مجربها, تكون مابتلجأش للقيصري إلا في حالات الضرورة القصوى ماتبقاش واخداها سبوبة

- لما تلاقوا واحدة تحسوا إنها موثوق فيها و نسبة الولادة الطبيعي عندها عاليه صلوا إستخارة و ثقوا فيها

- الثقة في الدكتورة بتاعتكم مهمة

- أغلب الناس في المدن عندها نقص فيتامين د بحكم قلة شرب اللبن الحليب و قلة تعرضهم للشمس بصورة مستمرة

- لو لقيت مراتك بتاكل كتير مالكش دعوة بيها, لإن بتحصل إنها بعد الولادة بتخس اللي تخنته و الراجل بيفضل زي الدرفيل

- ماتجيبش لمراتك حاجة حلوة عشان (قال إيه) تدعمها نفسياً و بعدين تاكلها منها

 

- طلق الولادة:

* فيه ناس مابيجيلهاش طلق لحد الشهر العاشر بالذات في أول بيبي
* فيه كلام إن فيه حاجات بتحمّي الطلق بس مش متأكد أو ماعنديش معلومات كافية عن الموضوع ده (بس إحنا كنا بنجرب)
* فيه ناس الطلق عندها بيقعد بالإسبوع زي ما حصل معانا
* أول ما الطلق يبتدي ييجي جهز نوتة واكتب فيها مواعيد كل طلقة و كل طلقة قعدت قد إيه
* كلام الدكتورة لينا إن لحظة الولادة بتحين لما يكون بين كل طلقة و التانية خمس دقايق و كل طلقة مدتها تكون حوالي دقيقة
* اللي حصل معانا إنها كانت كل 6-8 دقايق بس دخلنا في لحظة الولادة
* فتحة عنق الرحم لازم تكون مقاس 10 أو أكبر عشان البيبي ينزل سليم

- البيبي لو تبرز في الرحم (أو ابتدى يصفي المياه اللي حواليه) يبقى لازم يطلع في أقرب وقت لإن فيه خطر على حياته, كله على حسب تقدير الدكتورة (مانا قلتلكم لازم تكونوا واثقين فيها و في شرف مهنتها)
لإن ممكن تكون فتحة عنق الرحم بقت أكبر من 10 في الوقت اللي اتبرز فيه ف يكون أفضل له إنه ينزل طبيعي لإنه أسرع, و لو كان الفتحة أضيق يبقى و الله أعلم القيسري هايكون أنسب لإن ديه هاتعتبر خطر زي ما قلت قبلاً

- فيه ممرضين مهملين, عشان كده اقعدوا مع الدكتورة افهموا منها خطة الولادة كاملة و لازم تحفظوها زي اسمكم و تراجعوا معاها أيه العلامات الخطر و تتصرفوا إزاي في المواقف المختلفة

- قبل الطلق أو أثناء الطلق لو فترته طولت أحياناً فيه مياه بتنزل, ف لازم تروحوا تكشفوا عليها او تكلموا الدكتورة تتابعوا معاها, لإن قد تكون مياه البيبي ابتدت تصفي

* طب هاتعرفوا منين؟ لو الكمية صغنونة كام نقطة مش مشكلة, بس الأحوط إنكم تكشفوا في المستشفى اللي هاتولدوا فيها, أرجع أقول في كل مكان فيه ناس مهملة, ف لازم تأكدوا مرة و اتنين, لو قالتلكم مش ولادة اسألوها ليه مش ولادة و العكس صحيح
* اللي يديكم معلومة تتأكدوا من سبب المعلومة, لو قال لكم المياه كتير, طب كتير قد ايه؟ طب هل الكيس فعلاً إتفتح, طب اعمل سونار و شوف, طب خلينا معاكم و نقيس على مدار ساعتين مثلاً كمية المياه و نشوفها هل بتقل فعلاً ولا ده مؤشر خاطئ و هكذا

- طلّع فلوس لله و صلي قضاء حاجة كتير

 

ساعة الولادة:

* سرة البيبي مابتتقطعش في ساعتها
* البيبي مايستحماش بشاور أول مايتولد (يتاخد بعبله كده على صدر أمه) لإنه محتاج يلامس بشرتها حاجة بيسموها skin-to-skin
* ملامست البيبي لبشرة أمه بتديه إحساس بالأمان بيزود إدرار اللبن و بينظم درجة حرارة جسمه, و اللي يقولك إيه الهتش قل له يفتح على مواقع الطب و يشوف و يقرا بدل ماينتقد و السلام
* البيبي أول مايتولد غير ملامسته لبشرة أمه بيبقى محتاج ياكل (مش إنه ياخد دش)
* البيبي أول مايتولد (لو مافيش حضّانات لازم يرضع من والدته - لبن السرسوب-
* إتفق مع المستشفى و الممرضات على الكلام اللي فوق ده عشان مايجيش حد يطلعلك زي الخازوق يقولك هات الواد نحمّيه
* ماتنساش تأذن للبيبي

- لو لقيت فرصة تنام قبل الولادة ابقى نام

- تمالك أعصابك في كل الحالات و خلي معاك حد ثقة (أخوك - صاحبك - جارك) و يكون معاه فكة و يزيح عنك عك الورق و يكون بيعرف يتصرف  لو لا قدر الله إحتاجتوا حاجة ... إلخ

- دكاترة الولادة عموما يبقوا معذورين لو ماردوش على إستفسارتكم في وقتها لإنهم جايز يكونوا بيولدوا حد تاني أو في طوارئ, ماتضايقش من الدكتور و حاول دايماً تجمع أسئلتك و تديهالها دفعة واحدة بدل ما كل شوية تبعت تستفسر فرداني

- الدكاترة لما بيبقى عندهم حالتين في نفس الوقت ممكن يطلبوا منك تروح نفس المستشفى اللي هما فيها

- لو الدكتورة (اللي بتتقي الله) و بتتابع معاها شغالة في نفس المستشفى يكون أفضل

--- سمعت أخيرا عياط البيبي, حمد الله عالسلامة :) ربنا يباركلك في المولود و يطرح فيه البركة

 

---

ثالثا - ما بعد الولادة

انا اصلا كنت فاتح اكتب عن تالت جزء ده بس الموضوع بهوأ مني زي ماحضرتك شايف :)

أولويات ما بعد الولادة

عشان نقدر نتكلم و نفهم الكلام هاياخدنا على فين لازم نحدد أولوياتنا, بالنسبة لينا أولوياتنا كانت:
1- الطفل يرضع طبيعي
2- صحة الأم النفسية
3- الشغل
4- صحتي النفسية
في السياق ده هاحاول أوضحلكم شوية نقط و نصايح

الرضاعة

- سبق و قلت إن الطفل أول مايتولد لازم ياخد اللبن من صدر أمه (اسمه لبن السرسوب) تقدروا تتعلّموا أكتر عن لبن السرسوب في اليوتيوب (كان فيه حلقة للشقيري بيتكلم فيها عن الرضاعة الطبيعية مع دكتورة أسماء صادق)
- في أول ولادة مُتوقَّع إن اللبن اللي الأم بتنتجه يكون قليل و ممكن مايكونش مقضيه و هنا الدكاترة بينقسموا قسمين في رأيي:
1- دكاترة بيستسهلوا و يقولولك شربيه لبن صناعي (و بشدد على إنه استسهل يعني إن ده أول حل لجأ له مش بعد ماتعب و عافر مع الأم و ماكانش فيه ملجأ غير ليه و هاوضح ليه قدام)
2- دكاترة بيقعدوا يعافروا معاكي لحد ما لبن الأم يزيد (و فيه طرق الحمد لله بتنفع عشان تزوده على الرغم من تشكيك البعض في الموضوع بس أعتقد إن الموضوع ده يرجع لطبيعة الجسم إن كل جسم ممكن يستجيب بمقدار غير التاني)
- طبعا مش محتاج أقول لو لقيت الدكتور من النوعية الأولى سيبك منه و ماترحلهوش تاني :D
- ممكن الدكتور/ة اللي بيعافر معاكي ينصحك تديله لبن صناعي لو وزنه أقل من الوزن الحرج

زيادة لبن الأم

طيب بالنسبة لطرق زيادة اللبن اللي جربناها و نفعت:
- الميااااااااااااااااااااااااااااه اشربوا مياه أثابكم الله, اشربوا من 5 ل 7 لتر مياه في اليوم, كتر المياه مابيزودش اللبن بس قلتها بتقلل اللبن, ف خليكم في الأمان و اشربوا مياه كتير, و لو مش هاتقدري تاخدي بالك من المياه خلي حد تبقى كل مهمته في الحياة إنه يفكرك تشربي مياه و دائماً يحضرهالك/يملالك الأزايز - احنا عندنا كارثة في موضوع شرب المياه ده
-الأكل الأم أول مابتولد بتاكل كل حاجة ممكنة (و فيتامينات بالذات فيتامين د) عشان جسمها و عشان الطفل, الدكتورة بتاعتنا كانت مأكدة علينا (كلي كل حاجة و اشربي كتير) (بس ضروري جداً جداً تراجعوا قسم الحساسية اللي كاتبه تحت ضروري يا أهل الخير)
- كبسولات الهيربانا كانت كويسة جدا الحمد لله, الموضوع كان بيفرق جدا (لو ماعندكش هيربانا جرب أي كبسولات فيها مُستخلص الحلبة و الكراوية/الكمون و ينسون بس ضروري الحلبة)
- الأعشاب بتساعد الطفل إنه يتكرع و يطلع الغازات (الأم هي اللي تشربها مش الطفل, الطفل عشان مايشربش مباشرة إلا بعد 6 شهور و دي آخر معلومة موثوق فيها عندي)
- التشفيط سواء بالبامب العادي أو الكهربا, و أحسن من الاتنين بكتير التعصير باليد لو ماعرفتيش تعصري باليد يا إما جوزك يساعدك أو تخلي حد عارف الموضوع ده يساعدك
- إن تخلي الرضاعة على حسب طلب الطفل, بمعنى إنه كل لما يطلب الأكل يلاقيه (مش بجدول) و لكن فيه هنا كذا نقطة حابب اتكلم فيهم:
1- فيه مدرستين, الأولى بتقول إن الرضاعة لازم تبقى بجدول و التانية بتقول إنه لأ على حسب طلب الطفل
2- وجهة نظري المتواضعة إن كل حاجة على حسب الوضع الحالي مش إن فيها قاعدة مُتَّبَعة: يعني مثلاً لو لبنك أقل من المطلوب (و هانشوف بعدين بنقيس أو بنعرف إزاي) يبقى مناسب ليكي أكتر الرضاعة على حسب طلب الطفل, و لكن لو لبنك ما شاء الله كتير يبقى مهم إنك تعملي جدول عشان تظبطي أحاسيس الطفل, إنه ياكل و يهدى عشان يهضم
3- قياس مدى جودة أو كمية اللبن بيكون عن طريق حاجتين أعرفهم, أولاً متابعة وزن الطفل كل إسبوع, ثانياً التعصير مرة كل كام يوم بالإيد و تحسبي قد ايه نزل بس تاني طريقة دي صعبة شوية لإن ممكن ماتعصريش كل اللبن, لإن سبحان الله أفضل طريقة لإستخراج اللبن من صدر الأم هو رضاعة الطفل

نقص لبن الأم

 و ماينعفش نسيب قسم زيادة اللبن من غير مانذكر إن فيه حاجات بتقلل اللبن زي:
قلة المياه اللي ال/ بتشربها
النعناع
الزعتر
البردقوش
الطماطم

 

نيجي بقى لموضوع كبير جداً ناس كتير مابنبقاش واخدة بالها منه و فيه ناس ممكن تتغافل عنه و اللي كان السبب أصلاً في إني اكتب ده كله عشان لو حد هايعاني أتمنى إني أقلل معاناته على قد ما أقدر

الحساسية

حساسية الأطفال شيء وارد جداً و شائع بين الأطفال حديثي الولادة بتتراوح في شدتها و في مدتها (ممكن تقعد مع الطفل من 3 شهور لحد سنتين) في الغالب بتمشي بعد ست شهور و تاني الغالب بعد سنة

انا أعرف ناس اتبهدلت تقريباً بسبب الحساسية و الدكتور ماشخصهاش للطفل و ياعيني تعبوا جامد و في المصاريف كمان بسببها (لإنهم كانوا بيصرفوا لبن صناعي اللي و الله أعلم تقريباً كان الطفل عنده حساسية منه و بالتالي بيرجّعه) , و أعرف دكتور مايستحقش أصلاً كلمة دكتور كان هايلبسنا في الحيط لبسة لوز

طيب أيه قصة الحساسية دي؟

لبن الأم بينزل فيه كتير جداً من أكل الأم, يعني لو الأم شربت لبن /أكلت بيض / أكلت فول / أكلت لحمة بروتينات الأكل ده و شوية حبشتكنات تانية تنزل مع لبن الرضاعة مع شوية أجسام مضادة (سبحان الله لبن الأم ده حاجة برنس جداً)
ف طبعاً كل البروتينات دي لازم الجهاز المناعي بتاع الطفل يعديها أو يهاجمها لإنه لسه بيتكون.

أعراض الحساسية

فيه أطفال جهازها المناعي مابيتقبلش حاجات كتير قبل 3/6/12 شهر
ف نلاقي النتيجة إن الأم مثلاً تشرب كباية لبن بقري/جاموسي ف الطفل يتحسس منه و يبتدي يحصل عنده أعراض حساسية اللي من ضمنها:
1- إن الطفل يتقيأ (يرجّع) الأكل -اللبن- اللي أكله
2- إن الطفل يحصل عنده إرتجاع (reflux) و ده بيحصل لما عضلة فُم المعدة ماتكونش قوية لسه ف لما المعدة تهيج بسبب الأكل بترجع جزء من الأكل (و اللي بيبقى فيه أحماض) في المريء بتاع الطفل ف تحس إن فيه صوت مياة طالعة نازلة في صدر الطفل
3- وشه يظهر فيه حبوب
4- الطفل يسخن أو يجيله تسلخات
5- بالتالي الطفل هايبقى نومه صعب جداً لإنه هايصحى كل شوية في الوقت اللي طبيعي إنه ينام فيه في حدود 12-18 ساعة في اليوم

طيب إيه علاجها؟

للأسف مافيش علاج لإن دي حاجة طبيعية في تكوين جسم الإنسان

فيه أدوية بتخفف حموضة المعدة و بالتالي ماتحرقش للطفل المريئ ف يقدر ينام بسلام, و لكن على صعيد آخر كتر الدوا ده مابيخليش الطفل يهضم الأكل كويس ف لازم دائما تتابع مع دكتور و هو اللي يقول امتى تبدأ او توقف

طيب يعني نتصرف إزاي؟

أولاً:

الوقاية خير من العلاج, بمعنى .. إننا مانديلهوش حاجة بتسبب حساسية أصلاً, بمعنى .. إن الأم تمتنع (منع إلتزام صارم) عن مُسببات الحساسية
طب ما هاتقولي و هانعرف منين هو عنده حساسية من إيه؟ زي ماتفقنا بما إن أهم حاجة هي صحة الطفل ف هانمنع كل الحاجات اللي ممكن تكون سبب في الحساسية زي:
*اللبن البقري/الجاموسي و مشتقاته (الزبدة/السمنة/الزبادي/الرز بلبن/الجبنة)
*البيض
*البروتين البقري/الجاموسي (اللحمة و مشتقاتها كلها)
*الصويا (و دي كارثة لإنها موجودة في حاجة حلوة كتير جدا من اللي جاهزة في السوبر ماركت) و بتلوث منتجات تانية كتير زي بعض أنواع الملح و العيش التوست (اللي من السوبر ماركت) - أغلب مشاكل الصويا في السوبر ماركت لإنها بتبقى من مصانع و المصانع غالباً بتبقى بتطلع كذا منتج على نفس خط الإنتاج (لو خط تغليف منتجات مثلاً) و ممكن يبقى بيشغل صويا على نفس الخط
*الصويا كمان موجودة في بعض الفيتامينات اللي في الصيدليات (بالذات فيتامين E) خدوا بالكم و إقروا مكونات الحاجات الله يبارك لكم
*المكسرات بأنواعها
*المكرونة البشاميل و أي حاجة مطبوخة بسمنة/زبدة/لبن/زبادي (ماتحوّروش من الآخر)

ثانياً:

لو الطفل عنده حساسية و الأبوين تجاهلوها وارد جدا إنه لا قدّر الله تفضل معاه طول عمره,  و صدقوني انتم مش عايزين ابنكم يبقى عنده حساسية لبن و هو كبير :) 

ملحوظات:

1- الفكرة إن انا و مراتي كنا بنتمرقع الصراحة ف اللي هو كنا كل كام يوم مثلاً اقول اسندها بكُباية لبن, طب سندوتش جبنة مايضرش, طب جربي صباع المحشي (ابو سمنة) ده كده و ماتخافيش مش هايجرى حاجة, خدي كده شوفي الكيكة الجميلة ديه أصل مافيهاش غير بيضاية , أكيد مش هي اللي هاتتعبه

و كانت النتيجة إننا قعدنا فوق الشهر بنعاني و ده لإن الجسم بيتخلص من بواقي اللبن في حوالي 3 أسابيع, ف لما تمنع اللبن مش هاتقدر تعرف نتيجته غير بعدها ب 3 أسابيع (انا عارف إني رخم بس خلينا فاكرين إن صحة الطفل فوق أي إعتبار - إلا لو صحة الأم هاتبقى في خطر يعني خليكم منطقيين-) و بيتخلص من بواقي البيض في يوم/يومين و هكذا

2- العزومااااااااااااااااات و القرايب:
أولاً: إنتوا هاتبقوا مُحرجين جدا إنكم ترفضوا العزومة و لو قبلتوها هاتبقوا مُحرجين تقولوا للناس يطبخوا إيه و مايطبخوش إيه, عشان خاطر إبنكم ماتُحرَجوش على حساب صحته, صحته أهم مليون مرة من شكلكم قدام الناس

ثانياً: مش كل الناس تعرف عن موضوع الحساسية ده, و نظراً لإنتشار الطب الشعبي ف الناس (عشان فعلاً بيحبوكوا بالذات الأمهات) بيبقى خايفين لا تكونوا بتدلعوا ابنكم أو إن هو نفسه يكون بيتدلع و إن أكيد مش هايتضرر لو لزقوا معلقة سمنة صغيرة كده في الجلاش مش هاتحسوا بيها ولا رشة فلفل عشان تدي طعم للبسلة :)

طيب مش كده لما تمنعوا الحاجات دي كده لبن الأم و صحتها هايضعفوا؟

 و الإجابة الصادمة إنه لأ إن شاء الله مش هاتضعف (وإن حصل مش هايكون شديد زي ما الناس متصورة) مش هاتضعف لإن فيه بدايل كتيرة صحية الحمد لله بس مابناخدش بالنا منها
زي السمسم/الطحينة/الحلاوة (بالنسبة للكالسيوم)
زي الحنطة السودا (Buckwheat)
زي العسل الإسود و عسل النحل
زي الشوفان و أكلاته الكتير جدا (يكفي إنك ممكن تسلقي الشوفان مع شوية قرفة و زبيب و فانيليا و سوداني(لو الطفل ماعندهوش حساسية) و إن شاء الله هاتنبسطوا جداً
زي الفاكهة كلها و بالذاااااااااااااااااااات البطاطا, البطاطا ياخوانا و الله العظيم مفيدة جداً من أكتر الفواكه المفيدة عالكوكب و الكيلو في الموسم بتاعها ب 2 جنيه و نص :D و ممكن تتقلي زي البطاطس بالضبط , و ممكن يتطبخ بيها مع الجزر مع البسلة و غيرهم كتير جداً
زي المياه, هاتتفاجؤوا إزاي المياه بتأثر على لبن الأم تأثير مباشر

حساسية بتنجان ؟

مافيش حساسية بتنجان (بتنجان فعلاً مش ببالغ)  طب ما انا ابني شاكّة إن عنده حساسية بس مابأكلهوش أكل من اللي مكتوب فوق و تعب لما كلت مسقعة

هنا نيجي لنقطة تانية, فيه تشخيصات مشابه جداً للحساسية ألا و هو عُسر الهضم أو يكون عنده Food intolerance, إن البيبي مش مستحمل الأكل (بس ماعندهوش منه حساسية) ف نلاقي إن برضه الإرتجاع أو حموضة عنده و مش عارف ينام
طب إيه الحل؟
الوقاية خير من العلاج قبل أي حاجة بس برضه نضيف شوية ملحوظات على نوعيات معينة من الأكل:
1- البسلة - الذرة - تفاح مش متقشر ... أي أكل ليه قشرة: القشر عموماً بيتعب القولون
2- الطماطم/البطاطس/البتنجان/الفلفل: دول كلهم من عائلة "الباذنجانيات" يا هايتقبلهم قبل سنة يا لأ, لو لأ يبقى يستحسن تستني بعد السنة قبل ما تدخليله الأكلات دي
3- التوابل: فيه أطفال بتتقبلها و فيه لأ, طب لو ماتقبلهاش كده؟ جربي تحطيها حبات صحيحة (لإن من أول نقطة إحنا عرفنا إن القشر بيتعب القولون) و تغليها و تاخدي المياه بتاعتها, لو تعب منها برضه يبقى خليها لبعد السنة
4- العسل/اللبن الحليب بأنواعه/السكر: ممنوعين قبل سنة
5- الملح: لو في العيش مثلاً بإذن الله مايضرهوش, لو حبيتي تحطي ملح يبقى قبل السنة بكام شهر و تبقى قرصة ملح (كام ذرة صغيرين)

ملحوظة

أي أكل شكّيتوا إنه بيجيب حساسية رجااااءاً افتحوا جوجل و اكتبوا (حساسية + اسم الأكل) بالعربي و بالإنجليزي (Food name + Allergy)
يعني مثلا أفوكادو, دوروا على جوجل: " حساسية أفوكادوا " أو " Avocado Allergy "

طب تفرقي منين مابين هو عنده حساسية منها ولا مش قادر يستحملها؟

بالنسبة لينا الفارق بين الاتنين كان: لو مامته أكلت الحاجة (ف نزلت في اللبن) و تعب منها يبقى غالباً حساسية, لو ماتعبش من لبن الأم اللي فيها الأكل ده و تعب منه مباشرة يبقى غالباً مش مسمتحمله

طب لو انت برضه مش قادرة تفرقي أو حاسة إن الدنيا متلغبطة و مش عارفة مين بيعمل إيه؟

هاتضطروا الأول توصلوا لحالة مستقرة بأكل آمن زي الكوسة و البطاطا و السبانخ, تفضلوا عليهم كام يوم لحد ما جسمه يتحسن, لو بعد الشهر السادس ممكن تبدءوا تحطوا ربع معلقة صغيرة دبس تمر أو تمر رطب عالوجبة .. التمر راااااائع بس حاسبوا لا يتعود عالسكر دي التريكّة
لما تلاقوا تحسن في صحته, تبدءوا بحاجة واحدة بس, طمام على سبيل المثال, تقشروها و تغلوها كويس و تصفوا المياه بتاعتها و تحطوا المياه دي (فيه أطفال مابتستحملش الألياف) و تشوفوا إيه اللي هايجرى لو ماحصلش مشاكل تزودوا نسبة الطمام في نفس جرعة المياه لو ماحصلش حاجة, تبدءوا تفرموا الطماطم المغلية و هكذا, و أي تدهور في الوضع ترجعوا للخطوة اللي قبلها

---

الختام

• بس كده يا سيدي/سيدتي الأفاضل, خلوا بالكم على صحة إبنكم, ماتتهاونوش فيها, هي أغلى من صحتكم( في أغلب الأحيان  يعني :D دائما أحكموا بموضوعية ماتاخدوش حاجة في المطلق)

• إستشيروا دكاترة مُحترمين (معيار الدكتورالمحترم هو اللي بيخرج بالمريض من حالة التعب لبر الأمان و يهدّي الشخص اللي جاي له و يبسطه .. ده مهم جداً) لإن فيه دكاترة حرفياً بيزعقوا لزباينهم و يحسسوه بمدى الكارثة اللي هو عملها بحيث معنوياته تحبط أكتر و مايعملش أي حاجة تاني بقى :D و فيه دكاترة بيعرفوا يهدّوا الناس اللي معاهم و يفهموهم الصح من الغلط و يساعدوهم على الصح (ربنا يكتر من أمثالكم و يبارك لكم و الله على اللي بتعملوه و أخص بالذكر الدكتورة اللي كنا متابعين معاها)

• انا مش دكتور, انا مُبرمِج, اتعرضت للتجارب اللي فوق ديه و كان واجب عليا إني أشاركها مع الناس يا رب تقليلاً لمعاناتهم و إنهم مايبقوش ماشيين في الظلمة وسط شائعااااااااااات كتيرة جداً منتشرة في البلد مالهاش أي أساس من الصحة
  

• إقروا كتير من مواقع رسمية زي الصحة الأمريكية/البريطانية/الأسترالية

• طب الأطفال بالذات صعب جداً لإنك بتتعامل مع حد قدراته التعبيرية عن نفسه مش قد كده و صعب تعمل له أغلب التحاليل

• مش شرط الدكاترة اللي بيكتبوا أدوية كتير يبقوا حلوين و بيفهموا و كذلك العكس

• لو دكتور كتبلك دوا اسأله, ليه كتبه؟ إيه المادة الفعالة اللي فيه؟ و إيه بديله؟ و هل ليه أعراض جانبية ولا لأ؟ و تتأكد من الصيدلي كمان
  *ليه باقول كده؟
  أولاً عشان انت أكتر حد المفروض يبقى عارف صحة إبنه و لإن فيه دكاتره بيكتبوا الدوا قبل مايسألوا هل أعراضه الجانبية ممكن تتعبه ولا لأ
  ثانيا عشان فيه دكاتره ممكن يكتبوا دوا عن دوا تاني لإن الشركة بتدفعلهم فلوس عشان يسوقوا للدوا الفُلاني

• خلينا نعمم النقطة السابقة و نقول إن أي حد يقول لك معلومة قل له إيه سبب المعلومة ديه أو انت بتنصحني النصيحة ديه على أي أساس
• ماتنسوش تطلعوا فلوس لله دائماً حتى لو الولد صحته كويسة, حتى لو مش أغنية, "سبقَ دِرهمٌ مائةَ ألفِ درهمٍ" 
  
  

  و السلام