احذروا قسم تقنية المعلومات الحيوية حاسبات و معلومات عين شمس ( Bioinformatics ), عملية نصب كبيرة

السلام عليكم, 

انا مين ؟!

انا خريج كلية الحاسبات و المعلومات - جامعة عين شمس - قسم Bioinformatics (تقنية المعلومات الحيوية)

طب ليه كاتب المقال ده ؟!

بكتب المقال ده لما اكتشفت ان الكلية و الجامعة مش مقضّياهم الفلوس اللي بيسحبوها من الطلاب في القسم ده من الكلية فحبوا يجيبوا ناس جديدة ((زبائن)) - و آسف في الكلمة بجد, بس مش لاقي وصف غير كده و ارجوا اللي هايقرا المقال مايتضايقش منّي - عشان يكسبوا منهم فلوس على الفاضي و هاتكلم بتفاصيل اكتر...

طب انت ليه ماتكلمتش قبل كده ؟!

لا انا اتكلمت, بس بما ان -عملية النصب- كانت على مستوى الكلية فكنت باتكلم اول كل سنة, بس واضح السنة دي إنّهم حبوا يوسعوا العملية شوية فكان لازم اوسّع انا كمان

واحنا ايه ضمنّا ان انت ماتكُنش بتكره الكلية او فاشل و بتعمل كده عنداً فيها ؟!

لإنّي دخلت القسم ده عن اقتناع تام, اقتناع طبعا بعد الكلام الحلو الكتير اللي سمعته عن القسم, و ده مش كلامي لوحدي ده كلام ناس تانيه غيري + الحمد لله انا تقديري جيد جداً ((او امتياز و كلّه على حسب اللائحة)) + انا باشتغل دلوقتي الحمد لله :)

ممكن تحكيلنا اكتر طب عن الموضوع ده...

الموضوع برمّته عملية نصب كبيرة و واسعة كمان :)
مش عارف فعلاً ابدأ منين, بس انا هاحاول ابقى عادل في كلامي على قد ما اقدر و هاتكلم عن الإيجابيات اللي شوفتها:

1. عدد قليل ((بس الصراحة ماقدرش اضمن الموضوع ده بعد ما الموضوع اتفتح)) مما يضمن فرصة انّك تسأل الدكتور
2. بتقدر تشوف ورقة امتحانك و لو ليك درجات بتاخدها

نيجي بقى لموضوعنا الأساسي اللي انا كاتب المقال ده كلّه عشانه ((تقريباً كده هاحكلكم القصة من الألف للياء)):
انا زي اي طالب جديد لسه داخل مبهور بالكلية
جيه دكتور رئيس القسم ((و مافيش اصلا رئيس قسم, بس كان بيقول كده على نفسه)) و اقنعنا ان احنا ندخله من كلامه الكتير اللي كان منه:

1. ان ديه اعلى مرتبات في العالم
2. و إن شغلنا محجوزلنا من قبل ما ندخل القسم
3. و إننا هانتخطف في أوروبا و أمريكا ((و طبعاً كله كلام ولا له اي اساس من الصحة و ده اكتشفته للأسف))
4. و ان احنا لينا Highly Prepared Laboratories معامل مجهّزة على أعلى مستوى
5. لينا انترنت خاص بينا ((طبعاً اييييييييي كلام))
6. كل واحد ليه جهاز الكمبيوتر الخاص بيه لوحده ((فيه بتاع 30 جهاز هما هما من قبل مايفتحوا القسم و اللي بايظ و اللي مالوش كيبورد اصلاً ولا ماوس و كل شوية كانوا يسألونا انتم هاتشتروا لاب توب ولا لأ, مع ان كده كده اساسي انك تشتريه))
7. هايجيلكم دكاتره من انجلترا يدرسلكم ((طول الاربع سنين ماجاش غير واحد من بره -مش من انجلترا بس مانعرفش منين- و اصلاً كان جاي مصر بيعمل حاجة تانية و صودِف و خلّوه يجي يدينا ندوة))
8. ليكم تدريب في الأجازات في شركات -اللي اصلا مش موجوده-
9. هانسفركم بره مصر في الصيف - مش محتاج ارد على دي :) يكفيني الصمت, احنا في رمضان-

دول و غيرهم كانوا الاسباب اللي خلًوني ادخل القسم ماتحققش منهم غير الإيجابيات اللي ذكرتها فوق :)
طب هو ده كده بس كل المشكلة ؟!!!
لأ إليكم المفاجأة الكبرى:

مافيش دكاترة Bioinformatics في مصر :D

هاهاهاهاهاها و الله هم يضحّك

فكانوا بيتصرّفوا ازاي ؟!
جِه واحد في الأول خالص عمل اللائحة و اللائحة اتصدق عليها و اتفتح القسم, قابلتهم مشكلة, ان مافيش دكاترة للمواد -اللي جابوها من النت- يدرسوها, فيعملوا ايه ؟! هات اي دكتور من علوم او من طب او من صيدلة يديها
نتج عن الكلام ده جهل بشع بإيه هو القسم اصلاً, لدرجة ان وانا في سنة تالتة اتفاجئت ان لحد دلوقتي مادرسناش Bioinformatics

و اذكر على غرار الموضوع ده خناقتين اتخانقتهم مع الكلية:

1. في مادة وانا في سنة تالتة اسمها Biotechnology ف من الواضح ان ماكانش في حد في مصر كلّها يعرفها, فاستعانوا بدكتورة من علوم بتدرس علم زراعة انسجة -احياء بحتة- و قالوا مش مشكلة تدرّسلهم فبقينا واحنا في سنة تالتة -حاسبات و معومات: يعني برمجة- بناخد ازاي نعقم حوض بالكحول, و بعدها نجيب فاصوليا منبّته و نقوم قاطعينها بالموس و حاطينها في برطمان جواه مادة لزجة كده, و نجيلها كمان اسبوع تكون نبّتت ((ياااااااااااااااا حلاااااااوة))
2. وانا في آخر ترم بقى كان في مادة تحفة اسمها Biophysics -بعد ماكنت فهمت يعني ايه Bioinformatics و كان عن طريق النت و الله العظيم ماحد فهمهوني في الكلية- المادة دي من المواد المهمة جدا جدا جدا في القسم -بس لو تتاخد كما يجب- بس احنا بقى كنّا بناخد فيها ايه ؟! كنا بناخد ان القلب بيحول الطاقة الميكانيكية لمش فاكر طاقة ايه, و إن ضغط الكرة الأرضية بيأثر على ضغط القلب, و إزاي نحط الجهاز اللي بيظبّط ضغط القلب في جسم الانسان و ازاي نشغله

الذنب مش كله ذنب الدكاترة اللي بيدونا ولكن حسبي الله و نعم الوكيل في اللي راجوا كلموهم و اتفقوا معاهم

بس أكيد الجامعة مصدّقة على القسم ده, هايكون ايه مصلحتها ؟!

نيجي لموضع تاني مهم و حيوي جداً, انك هاتدفع 11,000 جنيه في السنة
66% من الحداشر الف دول رايحين للجامعة ^_^
و الباقي بيتقسم عليك انت و الكلية العادية

اللي بيتقسم عليك ده بقى بيتدفع منه مرتبات الدكاترة و العمّال ... إلخ 

لسه مش حاسس برضه انّه نصبxنصب ؟!

ال Bioinformatics ده علم كبيييييير و مهم جداً جداً جداً
احنا طول الاربع سنين ماخدناش غير بدائيات أسهل حاجة فيه :) و اللي كان بيدرسهالنا المعيدين مش الدكاترة :)

طب استنى استنى مش معنى ده كلّه ان مافيش تطوّر, اتفائل و قول اللي جاي احسن :)

الكلام اللي قولته ده قولته عشان حاجة -اكبر مشكلة في القسم ده في إدارته و اللي اكبر منها هو اللائحة الخربانة اللي فيها بنود متعادة اساسا و غلطات في الدرجات و التقديرات و بلاوي سودة تانية كتير-
بعد مشكلة سنة تالتة قالولي معلش كمّل الترم ده و اللائحة هاتتغير في الصيف, طبعاً زي العبيط صدقتهم, عدت أجازة الصيف, و ولا اي حاجة اتغيرت

جت مشكلة سنة رابعة و عملت مشكلة كبيرة و روحت لمكتب رئيس الجامعة و كنت ناوي اصعّد الموضوع, قالولي خاف على سمعة القسم, و اللائحة كده كده هاتتعدل -ده كلام المنسق اللي المفروض كنت باحترمه- زي العبيط لتاني مرة صدّقتهم واهو الالاجازة عدّت و ولا الهوا :)
لو كان فيه نيّة إنهم يطوروا القسم انا كنت سكت و ساعدت في العملية دي فعلاً بس النيّة مش موجودة اصلا :)
واما قولتلهم هاكلّم الدفعات الجديدة عشان مايدخلوش, حاولوا يقنعوني بطريقة رخيصة جداً إنّي ماعملش كده, و هو ان بكده هابوظ سمعة القسم ((اللي كله فاكرها دهب)) و بكده انا مش هالاقي ليه شغل و باضرني

===============================================

و طبعاً لما جيت وانا في سنة تانية أحوّل من القسم, ماينفعش وقعدوا يتلككوا بحاجات ماينفعش تتقال :))

================================================

احب اختم كلامي بكلمتين

حسبي الله و نعم الوكيل و خلّوا بالكم :) القسم ده نصب في نصب, ماحدش يدخله :)

اه وعلى فكرة اللي عايز اي دليل على اي كلمة من اللي قولتها انا في الخدمة :)